तरी एकटी नांदत असते

गूज मनीचे सांगायाला
आरशासवे बोलत असते
खूप माणसे सभोवताली
तरी एकटी नांदत असते

नसे बालपण आठवायला
तारुण्याची तीच कहाणी
वसंत आला, निघून गेला
ग्रिष्माची नेहमी विरानी
वेदनेतही जीवन गाणे
आळवीत ती सुरात असते
खूप माणसे सभोवताली
तरी एकटी नांदत असते

विद्याविभुषित झाली होती
मोठी आशा मनी ठेउनी
स्वप्न केवढे साधे होते
जगावयाचे माणुस म्हणुनी
वशिला नाही तिला कुणाचा
तरी नोकरी शोधत असते
खूप माणसे सभोवताली
तरी एकटी नांदत असते

सराव असुनी अंधाराचा
म्लान म्लानसे दिसे पाखरू
गौतम बुध्दा जरा लक्ष दे
खचते आहे तुझे लेकरू
हास्य लेउनी ओठावरती
अंतरात ती खितपत आहे
खूप माणसे सभोवताली
तरी एकटी नांदत असते

हिरे, माणिके अन् रत्नांचे
स्वप्नही तिला कधी न पडले
काल संपला, आज जगाया
जिद्दीने लढते, धडपडते
नैराश्याला दूर ढकलुनी
पुढे पुढे ती चालत अस्ते
खूप माणसे सभोवताली
तरी एकटी नांदत असते

तिला मिळाली गार सावली
अनामिकाची जशी अचानक
हास्य उमलले ओठांवरती
भूतकाळ विसरुनी भयानक
आनंदाच्या डोही हल्ली
सूर मारुनी पोहत असते
खूप माणसे सभोवताली
तरी एकटी नांदत असते


निशिकांत देशपांडे. मो.क्र. ९८९०७ ९९०२३

प्रजोत्पादनासाठी

सुडौल तरुणी गरीब, पुसते खळगी भरण्यासाठी
गर्भाशय का हवे कुणाला प्रजोत्पादनासाठी?

जाहिरात वाचुनी जोडपी कैक चौकशा करती
सरोगेट मम्मी होण्याचा भाव काय? ते पुसती
हवी उच्चभ्रू वांझ स्त्रियांना दीपक अथवा पणती
निपुत्रिकाचे जीवन जगणे नको नको त्या म्हणती
अपत्त्य होऊ शकणार्‍या ललनांचे तर्क निराळे
"नकोच आई होणे" बांधा, उभार जपण्यासाठी
गर्भाशय का हवे कुणाला प्रजोत्पादनासाठी?

ठरलेल्या सौद्याची राशी फक्त प्रेरणा होती
व्यापाराचे सूत्र पाळले, कुठे भावना नव्हती
व्यभिचाराची टोच कशाला? जिथे वासना नव्हती
यशस्वीपणे केली क्रत्रिम गर्भधारणा होती
काळ चालला हळू केवढा! तगमग शिगेस गेली
दोन्ही बाजू वाट पाहती बाळ जन्मण्यासाठी
गर्भाशय का हवे कुणाला प्रजोत्पादनासाठी?

जशी घडी येऊन ठेपली तसा जन्मला कान्हा
व्हायचे तसे सर्व जाहले, समाधान सर्वांना
सौदा होता जरी जन्मण्यामागे इवला तान्हा
जन्म घातलेल्या आईला फुटू लागला पान्हा
घालमेल जाहली सुरू अन् उशीर झाला कळण्या
नाळ कापली बाळाशी, नेहमी काचण्यासाठी
गर्भाशय का हवे कुणाला प्रजोत्पादनासाठी?

बाळ दिले व्यवहार संपला, तगमग सांज सकाळी
दु:ख लागले हात धुवोनी मागे तिन्ही त्रिकाळी
चूक जाहली सरोगसीची, करती सर्व टवाळी
तिने खरे तर दु:ख घेतले लिहून अपुल्या भाळी
पुसेल का ती पुन्हा कधी लोकांना पैशासाठी?
गर्भाशय का हवे कुणाला प्रजोत्पादनासाठी?

सौंदर्याचा ध्यास जयांना अन् त्या निपुत्रिकांनी
पैशाच्या जोरावर असते केलेली मनमानी
बालगृहातिल बाळ शोधुनी एखादे अनवाणी
दत्तक घेउन म्हणता येती अंगाईची गाणी
माफक आहे किती अपेक्षा सुजाण लोकांकडुनी!
निराधार एका बाळाचे भाग्य खुलवण्यासाठी
गर्भाशय का हवे कुणाला प्रजोत्पादनासाठी?


निसिकांत देशपांडे

हसावयाचे

आनंदाचा लेप लाउनी जगावयाचे
ठराव केला, दु:ख असू दे , हसावयाचे

मंतरलेला काळ आठवे जेंव्हा जेंव्हा
गंध दरवळे मनात माझ्या अमाप तेंव्हा
भूतकाळच्या हेमकणांना टिपावयाचे
ठराव केला, दु:ख असू दे , हसावयाचे

नभास बाहूमधे भरावे, मनी इरादा
चौकटीतला गुदमर सोसुन काय फायदा?
धीर धरोनी श्वास मोकळे भरावयाचे
ठराव केला, दु:ख असू दे , हसावयाचे

जिथे जायचे तिकडे सारे उडून गेले
एकलपणचे सदैव असते रिचवत प्याले
विरान रस्त्यानेच एकटे फिरावयाचे
ठराव केला, दु:ख असू दे , हसावयाचे

कधी न दिसतो त्या देवाला पूजत असते
सुख ना येते कधी अंगणी, उदास नसते
मनी ठरवले बंडखोर मी बनावयाचे
ठराव केला, दु:ख असू दे , हसावयाचे

आत्मवृत्त मी लिहावयाला तयार नाही
लपवायाला एक जीवनी भुयार नाही
जीवन गाणे ध्वनिमुद्रित मज करावयाचे
ठराव केला, दु:ख असू दे , हसावयाचे


निशिकांत देशपांडे. मो.क्र. ९८९०७ ९९०२३

जीवन ताजे ताजे

होते माझे, आहेत माझे, असतीलही माझे
अशाच लोकांसंगे जगलो जीवन ताजे ताजे

वानवा कधी मला न पडली स्नेहाची, प्रेमाची
गरज कधी ना मला भासली अर्थाची, हेमाची
आप्तांच्या या जगात म्हणती मजला राजे राजे
अशाच लोकांसंगे जगलो जीवन ताजे ताजे

तुडुंब भरला डोह अंगणी, आनंदीआनंद असे
आठवणींचे तरंग उठती, भूतकाळही मंद हसे
भविष्यातही सर्व चांगले असेल माझे माझे
अशाच लोकांसंगे जगलो जीवन ताजे ताजे

नात्यांच्या या मळ्यात मिळतो, खूप खूप गारवा
सारे माझे मी सार्‍यांचा, विशाल हा कारवाँ
तृप्त जीवना आपुलकीची किनार साजे साजे
अशाच लोकांसंगे जगलो जीवन ताजे ताजे

माझ्यावरती सदा सावली देवाच्या मायेची
सावलीत त्या नसे काळजी नश्वर या कायेची
बघून माझे भाग्य चमकते, कुबेर लाजे लाजे
अशाच लोकांसंगे जगलो जीवन ताजे ताजे

काय बिघडले हत्ती जर का झुलले नाही दारी?
देव उगा का रुसेल जर मी केली नाही वारी?
सत्कर्माची फक्त तुतारी स्वर्गी वाजे वाजे
अशाच लोकांसंगे जगलो जीवन ताजे ताजे


निशिकांत देशपांडे. मो.क्र.९८९०७ ९९०२३

जिद्द असावी जगावयाची

दु:ख वेदनांनी भरलेली
सांज असूदे आयुष्याची
पैलतिराची ओढ कशाला?
जिद्द असावी जगावयाची

जीवन गाणे लिहावयाला
शब्दफुले मी वेचवेचतो
रंगसंगती खास योजुनी
माळ फुलांची मस्त ओवतो
रडगाण्यांना असे मनाई
अंगणातही फिरकायाची
पैलतिराची ओढ कशाला?
जिद्द असावी जगावयाची

वर्दळीतही कुटुंबियांच्या
एकटाच मी जरी राहतो
एक कोपरा घरात माझा
आठवांसवे मस्त बोलतो
सवय जडवली बालपणीची
बडबड गीते म्हणावयाची
पैलतिराची ओढ कशाला?
जिद्द असावी जगावयाची

शिशिराची चाहूल लागता
म्हणे कोकोळा मौन पाळते
आम्रमोहरासाठी पुढच्या
वास्तवात ती रियाज करते
सूर न हो बेसूर कधीही
अशीच मैफिल गाजवायची
पैलतिराची ओढ कशाला?
जिद्द असावी जगावयाची

हसणे, रडणे माझे कोणी
वाटुन घेण्या दिसले नाही
भीक मागणे कधी सुखाची
देवा पुढती जमले नाही
असू, नसू दे पंख, नेहमी
मनात इच्छा उडावयाची
 पैलतिराची ओढ कशाला?
जिद्द असावी जगावयाची

बघावयाची वाट कशाला
मरणाची, जे येतच असते
तिरडीवरचे प्रेत कधी का
जीवन सरल्याने हळहळते
सजून जाते, आस धरोनी
पुन्हा नव्याने जन्मायाची
पैलतिराची ओढ कशाला?
जिद्द असावी जगावयाची


निशिकांत देशपांडे. मो.क्र. ९८९०७ ९९०२३

स्वप्न रंगवित होतो

स्वप्न पडावे म्हणून निद्रे!
तुला आळवित होतो
सखीस स्वप्नी बघावयाचे
स्वप्न रंगवित होतो

स्पर्श मखमली मोरपिसांचे
आभासी, सुखकारी
वेदनेसही किनार मिळते
तुझ्यामुळे जरतारी
इंद्रधनूचे रंग घेउनी
तुला चितारित होतो
सखीस स्वप्नी बघावयाचे
स्वप्न रंगवित होतो

परस्परांना पूरक अपुले
लोभसवाणे नाते
चमचमणार्‍या दवात तू,मी
थरथरणारे पाते
नजरेने नजरेस सखीच्या
मी कुरवाळित होतो
सखीस स्वप्नी बघावयाचे
स्वप्न रंगवित होतो

ओंजळ तुझिया आठवणींची
रिती पाहिली करुनी
हाती उरला दरवळ इतका!
गेलो मी गुरफटुनी
तुझ्याच परिघामधे स्वतःला
बंदी बनवित होतो
सखीस स्वप्नी बघावयाचे
स्वप्न रंगवित होतो

प्रवासगाथा मी थांबवली
सरता दिशा दहावी
साथ देउनी दावलीस तू
मला दिशा आकरावी
तुझ्यामुळे नवक्षितिजे, कक्षा
मी धुंडाळित होतो
सखीस स्वप्नी बघावयाचे
स्वप्न रंगवित होतो

सुरावटींच्या कैक कळांनी
मैफिल ही सजलेली
सप्तसुरांच्या सरीत आपण
दोघेही भिजलेली
गुलमोहरल्या कैक क्षणांना
मनी साठवित होतो
सखीस स्वप्नी बघावयाचे
स्वप्न रंगवित होतो


निशिकांत देशपांडे. मो.क्र. ९८९०७ ९९०२३

शुभेच्छा--

सडा अंगणी, तोरण दारी, शोभा रांगोळ्यांची
मणमिणणार्‍या पणत्या देती आभा मांगल्याची
चला दिवाळी करू साजरी अंतरमन उजळाया
सुखसमृध्दी लाभो, गाऊ नांदी नववर्षाची

दिवाळीनिमित्त सर्वांना हर्दिक शुभेच्छा.

निशिकांत देशपांडे