हा एक काळ आहे

आयुष्य सांज झाली
सरली सकाळ आहे
तो एक काळ होता
हा एक काळ आहे

होतो कधी तिच्या मी
प्रेमात रंगलेला
मी एकटाच आता
प्याल्यात झिंगलेला
चढता नशा उमगते
जगणे रटाळ आहे
तो एक काळ होता
हा एक काळ आहे

माझ्याच इशार्‍यांची
त्यांना असे प्रतिक्षा
झालेत थोर, माझी
करतात ते समिक्षा
होतो जहाल केंव्हा
आता मवाळ आहे
तो एक काळ होता
हा एक काळ आहे

जोमात कधी चढलो
मी ऊंच ऊंच शिखरे
उठण्यास तेच गुडघे
करतात आज नखरे
उद्वेग वेदनांचा
आता सुकाळ आहे
तो एक काळ होता
हा एक काळ आहे

डौलात राज्य मीही
सिंहासमान केले
तख्ता अता पलटला
तह मी गुमान केले
गात्रात त्राण नाही
नुसते आयाळ आहे
तो एक काळ होता
हा एक काळ आहे

म्हणतो जरा शिकावे
सापासमान जगणे
टाकून कात नवखे
तारुण्य प्राप्त करणे
श्रावण सरी हरवल्या
नुसते ढगाळ आहे
तो एक काळ होता
हा एक काळ आहे

वृध्दत्व निर्मुनी तू
का वाटलेस देवा?
आयुष्य दे कसेही
चाखेन जणू मेवा
तू दूर, तुला का रे
माझा विटाळ आहे?
तो एक काळ होता
हा एक काळ आहे


निशिकांत देशपांडे मो.क्र. ९८९०७ ९९०२३
E Mail--- nishides1944@yahoo.com