विरानीत जावे

 विरानीत जावे

नको तो अबोला, विरानीत जावे
 स्वतःशीच बोलावयाला शिकावे

न देता तिला साद, प्रतिसाद येई
सदा उत्तराचीच ती वाट पाही
अबोलीसही बोलताना बघावे
स्वतःशीच बोलावयाला शिकावे

अचानक वसंतास घेऊन आली
मनी ग्रिष्म! हिरवळ कशी काय झाली?
मनाच्या कपारीत माझ्या रहावे
स्वतःशीच बोलावयाला शिकावे

दुराव्यातही गोडवा अनुभवावा
जसे ऊन दे सावलीचा विसावा
कुठे वाट चुकलो? स्वतःला पुसावे
स्वतःशीच बोलावयाला शिकावे

नको दु:ख आता कुणी सोडल्याचे
जरा तू मना शीक विसरावयाचे
चरे काळजाचे तुझ्या तू भरावे
स्वतःशीच बोलावयाला शिकावे


निशिकांत देशपांडे, पुणे.
मो. क्र. ९८९०७ ९९०२३