कमाल आहे स्वप्नामध्ये
आल्यावरही लाजत असते
नकोनकोच्या पडद्यामागे
प्रिया स्वतःला झाकत असते
हवेहवेसे मिळवायाला
शरीर करते बंड कधी पण
सभ्य मुइखवट्यासही नसावा
डाग जराही, सदैव दडपण
स्वतः पेक्षा प्रतिमेची का
मनात भीती नांदत असते?
नकोनकोच्या पडद्यामागे
प्रिया स्वतःला झाकत असते
अंधाराशी जाते जुळता
प्रकाश वाटे नको नकोसा
एक थांबतो ह्रदयी ठोका
जरा कुठे दिसताच कवडसा
वाट न दिसते पुढे मागुती
तरी चालते अविरत आहे
नकोनकोच्या पडद्यामागे
प्रिया स्वतःला झाकत असते
तना मनाच्या तांडवात या
मनास होते सदा डांबले
पिंजर्यात भ्रामक मुल्यांच्या
शरीर पूर्वापार कोंडले
तृणपात्याविन दवबिंदूंना
जगावयाची कसरत असते
नकोनकोच्या पडद्यामागे
प्रिया स्वतःला झाकत असते
स्वप्नांम्धुनी ये बाहेरी
कवेत घे तुझिया विश्वाला
वाट मोकळी करून दे तू
गुदमरलेल्या तव श्वासाला
लुटावयाला मुक्त जीवनी
आनंदाची बरकत असते.
नकोनकोच्या पडद्यामागे
प्रिया स्वतःला झाकत असते
निशिकांत देशपांडे, पुणे.
मो. क्र. ९८९०७ ९९०२३
No comments:
Post a Comment