श्रावण अंगी झेलत आहे

गोड शिरशिरी रोमांचित मी
श्रावण अंगी झेलत आहे
आठवणींशी आज सख्याच्या
मनमुराद मी खेळत आहे

रात्र संपता संपत नाही
विरहाला मी पेलत आहे
मालवावया दीप ये सख्या
रात्र विरानी तेवत आहे

अधीर तन अन् अधीर मनही
तुझीच चाहुल ऐकत आहे
नको नकोचा नकोच पडदा
दूर सारुनी ठेवत आहे

भार एवढा तारुण्याचा
सांभाळुन मी चालत आहे
येउन घे तू मिठीत मजला
तुझीच सारी दौलत आहे

कधीच नव्हते कवयित्री पण
आज वही मी शोधत आहे
तरल भाव कवितेत गुंफण्या
शब्द फुले मी वेचत आहे


निशिकांत देशपांडे मो. क्र. ९८९०७ ९९०२३
E Mail:- nishides1944@yahoo.com