चाहुल येता तुझी अचानक
मन माझे मोहरते
मनात जेंव्हा वादळ उठते
गीत तुझ्यावर सुचते
तुझ्या वावराने तर माझा
आसमंत भरलेला
आत माझिया बघता कळले
मी तेथे नसलेला
नशा वेगळी हरवण्यातली
झिंग केवढी असते!
मनात जेंव्हा वादळ उठते
गीत तुझ्यावर सुचते
आठवणींचा श्रावण असतो
माझा महिने बारा
सभोवताली सदैव वाहे
गंधित गंधित वारा
स्वप्नांच्या दुनियेतही तुझे
स्वप्न नेहमी पडते
मनात जेंव्हा वादळ उठते
गीत तुझ्यावर सुचते
एकदुज्यासाठीच निर्मिली
दोघांनीही हिरवळ
सहजीवन एवढे उमलेले!
घमघमणारा दरवळ
जीवन अपुले एक सोहळा
पदोपदी जाणवते
मनात जेंव्हा वादळ उठते
गीत तुझ्यावर सुचते
चल ठरवू! मी गीत तुझ्यावर
लिहितो लयीत एका
चाल बसवुनी शीक गायला
मस्त धरूनी ठेका
सहभागाने दोघांच्याही
मैफिल रंगत असते
मनात जेंव्हा वादळ उठते
गीत तुझ्यावर सुचते
निशिकांत देशपांडे, पुणे.
मो. क्र. ९८९०७ ९९०२३
No comments:
Post a Comment