जगून घे जरा जरा

लगेच श्वास तू भ्रुणा
भरून घे जरा जरा
लिंग निदाना अधी
जगून घे जरा जरा

जगास तू नकोस का?
विकृती बळावली
स्त्रीच माय देवता
संस्कृतीच हरवली
जन्मण्या अधीच नेत्र
मिटून घे जरा जरा
लिंग निदाना अधी
जगून घे जरा जरा

जन्मुनी रडायची
आज शाश्वती कुठे?
जन्मल्या चुकून ज्या
सदगती तयां कुठे?
अताच दु:ख भोगण्या
शिकून घे जरा जरा
लिंग निदाना अधी
जगून घे जरा जरा

सभ्य खूप चेहरे
आहेत येथे बेगडी
विषयलंपट भोवती
असतील तुझिया सौंगडी
कवायती लढायच्या
करून घे जरा जरा
लिंग निदाना अधी
जगून घे जरा जरा

रक्षणार्थ आपुल्या
खड्ग घे हातात तू
नकोस द्रौपदी बनू
कृष्ण धावा गात तू
भाग्य भाळी आपुल्या
लिहून घे जरा जरा
लिंग निदाना अधी
जगून घे जरा जरा


निशिकांत देशपांडे मो.क्र.९८९०७ ९९०२३
E Mail-- nishides1944@yahoo.com