व्हायचे ते जाहले
आज मी माझ्यात नाही
व्हायचे ते जाहले
प्राक्तनाचे भोग सारे
मी सुखाने भोगले
भोवती अंधार सारा
संपता संपेचना
वाट बघुनी पूर्ण थकले
सूर्य पण उगवेचना
जीवनाशी तह करोनी
श्वास होते घेतले
प्राक्तनाचे भोग सारे
मी सुखाने भोगले
का व्यथा इतरास सांगू?
मीच माझी सोबती
प्रश्न माझे, दु:ख माझे
वाजवू का नौबती?
व्यक्त होण्याला कधी मी
आरशाशी बोलते
प्राक्तनाचे भोग सारे
मी सुखाने भोगले
नार आली नार गेली
बाब नित्त्याची असे
एक महिला दिन तिचा जो
येतसे अन् जातसे
फ्रीज, टीव्ही आणि पंख्या
सम तिला का मानले?
प्राक्तनाचे भोग सारे
मी सुखाने भोगले
संपले मी, नवपिढ्यांनो
घ्या वसा तुम्ही तरी
खड्ग घ्या हातात आता
का शिकायत वैखरी?
हक्क घ्या झगडून तुम्ही
जे मला ना लाभले
प्राक्तनाचे भोग सारे
मी सुखाने भोगले
निशिकांत देशपांडे, पुणे.
मो. क्र. ९८९०७ ९९०२३
No comments:
Post a Comment