स्पष्ट जरा सांगावे म्हणतो

मनातले ते स्पष्ट जरा सांगावे म्हणतो
काळजातल्या धगधगीस मिटवावे म्हणतो

एक जमाना झाला जीवन एकएकटे
आठवणींचा किती पसारा किती जळमटे?
ह्रदयामधल्या कपारीस बुजवावे म्हणतो
काळजातल्या धगधगीस मिटवावे म्हणतो

कसा वेगळा फुलापासुनी गंध जाहला?
चकोर दावुन पाठ शशीला कुठे नांदला?
उत्तर नसल्या प्रश्नांशी झगडावे म्हणतो
काळजातल्या धगधगीस मिटवावे म्हणतो

मनोभावना व्यक्त कराया शब्द फुटेना
कागद शाई शिवाय दुसरा मार्ग दिसेना
जीवनातले वविरहगीत खरडावे म्हणतो
काळजातल्या धगधगीस मिटवावे म्हणतो

भाग्य लागते हवे हवे ते मिळावयाला
मीच शोधला उपाय माझा जगावयाला
प्याल्यामधले दु:ख मस्त रिचवावे म्हणतो
काळजातल्या धगधगीस मिटवावे म्हणतो

सुखदु:खांच्या पुढे सरकले जीवन माझे
भाव-भावनांचे ना उरले आता ओझे
"जे झाले ते ठीक" असे समजावे म्हणतो
काळजातल्या धगधगीस मिटवावे म्हणतो


निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com